O, yüz il önce, Azerbaycan'da anadan doğdu.
O, Türkce ve Erebce'yi yazıb oxumağı evde öyrendi, ve ömür böyü herkese öyretdi.
O, Azerbaycan ve Türklük düşmanı olan Quldur Rıza'ya baş eğemdi, ve zorunlu esgerliğe getmesin diye, Qum'da mollalıq dersine girdi.
O, Molla olandan sonra da, mersiye mollası olmadı, belke, Mekke'ye hacı qılavuzu oldu. Uzun süre, Marağa'dan ve Urmu'dan Haca yolcu götürdü, ve yaşamını böyle geçirdi. İkinci Pehlevi devrinde yalnız bu işle yaşamını ve geçimini sağladı.
O, Marağa'da en sayqın ve hörmetli insanlardan biri olaraq, heç zaman şahlığa baş eğmedi. Her zaman, öz dinsel araşdırmalarına, ve ailesinin yaxçı yetişmesine ve geçimi ile meşqul oldu.
O, sözde İslam hakimiyeti gelenden sonra, Şeri'etmedari'den yana olduğuna göre, ''Xelq Müselman Herekat''ına qatıldı. Öz mübarizesinde, İran İslam devleti terefinden tutulub zindana salındı.
O, molla parltarından soyunma hökmüne qarşı direndi, ve heç zaman İran İslam devletine baş eğmedi. Bütün hepis süresinde heç bir te'viz vermeden, inadla, öz düşünceleri üzerinde durdu ve öz paltarından da soyunmadı. İşqalçı rejim onu eğe bilmediğine göre, ve Marağa toplumunda onun belli sayqısı ve hörmeti olduğuna göre, onu 6 ay qanunsuz hepisden sonra bıraxmağa mecbur qaldı.
Bütün 6 ay onun hepis süresinde, men her gün Marağa zindanının önünde onun keşiğini çekdim ve onun çıxmasını gözledim. Men bir ömür onu seve seve, ve onun sevgisi ile böyüdüm.
O, mene ''düşüncemde güclü olamğı, zülm önünde direnişi, ve heç zaman, ama heç zaman zülme baş eğmememi öğretdi.
O, hepisden çıxandan sonra da, heç zaman bu rejime baş eğmedi ve baş ucalıqla, öz şexsi işleri ile uğraşdı.
Marağa milletinin üreğinde belli sayqın ve hörmetli yeri olaraq, bütün hayatı boyu, her zaman, her kesden ona sayqı ve hörmet yağdı.
O, molla olub da, molla rejimine heç zaman baş eğmeyib, ve İran İslam devletinden heç bir şey yararlanmayıb, yaşadığına göre, çox sayqın ve özel bir insan iydi.
Onun adı Hacı İbadulla Sediqi iydi.
O, geçen hefte, uzun, şerefli, başı uca, ve sayqılı yaşamdan sonra, gözünü bu hayata yumdu.
O, menim böyük babamıydı.
Onun bir gözel insan olaraq, gözel yaşamını, ve gözel, başı uca, eyağ üste, bu yaşama göz örtmesini özüme ve aileme bir onur qaynağı bilirem.
Başımız uca ve sağ olsun...

Oğuz Türk
2013